رفیع نگر— ایک نئی جاسوسی دنیا

  

ہر شہر کے دو چہرے ہوتے ہیں۔

ایک وہ، جو دن کی روشنی میں نظر آتا ہے؛ مصروف سڑکیں، بلند عمارتیں، بازار، پارک اور معمول کی زندگی۔۔۔

اور دوسرا وہ، جو رات کی خاموشی میں جاگتا ہے؛ جہاں کچھ راز اندھیرے سے بھی زیادہ گہرے ہوتے ہیں۔۔۔

رفیع نگر اسی دوسرے چہرے کی کہانی ہے۔۔۔

یہ صرف ایک جاسوسی ناول نہیں، بلکہ ایک مسلسل ادبی سلسلہ (Series) ہے، جس میں ہر ناول ایک نئے معمہ، نئے جرم اور نئے کرداروں کے ساتھ سامنے آئے گا، مگر شہر، اس کی تاریخ، اس کے مستقل کردار اور ان کے تعلقات ایک ہی دنیا کا حصہ رہیں گے۔۔۔

اس سلسلے کا مرکزی کردار مراد زہری ہے؛ ایک غیر معمولی ذہانت رکھنے والا تفتیش کار، جو ثبوتوں سے زیادہ مشاہدے پر یقین رکھتا ہے۔ وہ شور سے نہیں، خاموشی سے سراغ ڈھونڈتا ہے۔ اس کے لیے مٹی صرف مٹی نہیں، گزرے ہوئے قدموں کی گواہ ہوتی ہے، اور خاموشی بھی کبھی کبھی ایک مکمل بیان بن جاتی ہے۔۔۔

اس سیریز میں ہر معمہ Fair Play Mystery کے اصول پر قائم ہوگا۔ قاری کو ہر ضروری سراغ وقت پر دیا جائے گا، مگر حقیقت تک پہنچنے کا سفر اتنا ہی پیچیدہ ہوگا جتنا حقیقی زندگی میں ہوتا ہے۔ یہاں اتفاقات نہیں، وجوہات ہوتی ہیں؛ ہر کردار اپنے فیصلوں، کمزوریوں اور ماضی کے ساتھ زندہ محسوس ہوگا، اور ہر جرم کے پیچھے ایک انسانی محرک موجود ہوگا۔۔۔

یہ سلسلہ صرف قاتل کی تلاش نہیں، بلکہ ایک ایسے شہر کی تہہ در تہہ پرتیں کھولنے کی کوشش ہے، جہاں ہر گلی، ہر عمارت اور ہر خاموش رات اپنے اندر ایک نئی داستان چھپائے بیٹھی ہے۔

رفیع نگر میں خوش آمدید!

یہاں ہر راز کا ایک سراغ ضرور ہوتا ہے۔۔۔

بس وہ ہر کسی کو دکھائی نہیں دیتا۔

ناول سیریز نمبر مع نام

1- رات کے سائے